Skattalega óhagstætt fyrir ríkið að eigandinn sé sænskt félag

Það er óhagstæðara fyrir íslenska ríkið að eigandi HS Orku er sænskt félag en ekki kanadískt. Þetta segir forstöðumaður skattasviðs KPMG. Ef eigandinn væri skráður í Kanada, en ekki Svíþjóð, nyti íslenska ríkið aukinna skatttekna vegna eignarhaldsins.

Samkvæmt íslenskum lögum ber arðgreiðsla, sem erlent félag fær frá íslensku hlutafélagi, fimmtán prósent skatt sem íslenska félaginu ber að halda eftir af arðgreiðslunni og greiða í ríkissjóð.

Símon Þór Jónsson, forstöðumaður skattasviðs KPMG, segir í aðsendri grein í Morgunblaðinu í dag að þetta gildi um öll erlend félög. Það sem skilji á milli landa séu síðan tvísköttunarsamningar. Þannig hafi Ísland gert slíkan samning við Kanada og með honum lækki skatturinn niður í fimm prósent. Tvísköttunarsamningur milli Norðurlandanna feli hins vegar í sér að að arður frá íslensku félagi til sænsks félags sé undanþeginn skattlagningu á Íslandi ef sænska félagið sé raunverulegur móttakandi arðgreiðslunnar.

Símon Þór segir að ef horft sé til þessa sé óhagstæða fyrir íslenska ríkið að móttakandi væntanlegra arðgreiðslna frá HS Orku sé sænskt félag heldur en ef það væri kanadískt. Ef gert sé ráð fyrir að fjárfesting Magma Energy í HS Orku verði 30 milljarðar króna til 65 ára og arðurinn af fjárfestingunni verði 5 prósent árlega þá verði heildararðgreiðslur á 65 árum 97,5 milljarðar króna. Ef eigandinn væri kanadískt félag myndu skattekjur íslenska ríkisins verða tæplega 5 milljarðar króna en 0 krónur undir sænsku eignarhaldi eins og fyrirkomulagið sé núna.

Símon Þór setur þetta hins vegar fram með þeim fyrirvara að hugsanlega verði litið svo á að hið kanadíska móðurfélag sé raunverulegur móttakandi arðsins þrátt fyrir sænskt eignarhald, ekki sé sjálfgefið að litið verði á hið sænska félag sem eiganda arðsins í skilningi skattalega þótt það sé talinn eigandi í skilningi laga um erlenda fjárfestingu.