Aron áfram hjá Kiel til 2015

Aron Pálmarsson hefur skrifað undir nýjan samning við Kiel sem bindur hann við félagið til loka tímabilsins 2015.

Þetta tilkynntu forráðamenn Kiel í kvöld en Aron kom til félagsins fyrir síðasta tímabil. Hann framlengdi gamla samninginn sinn um tvö ár.

„Með þessu viljum við gefa til kynna að félagið er enn að taka skref í rétta átt," sagði Uli Derad, framkvæmdarstjóri Kiel, á heimasíðu félagsins.

Sjálfur sagðist Aron ánægður með samninginn. „Nú get ég einbeitt mér að HM með vinum mínum í íslenska landsliðinu og svo aftur að verkefnum Kiel," sagði Aron.