Ingvar: Við viljum alltaf meira

„Þetta er stærsti leikur ársins," segir Ingvar Árnason fyrirliði Vals. Hlíðarendapiltar leika í dag bikarúrslitaleik við Hauka sem hefst klukkan 16 í Laugardalshöll.

„Við vorum að spila á mánudaginn og eiginlegur undirbúningur fyrir þennan leik hófst á þriðjudag," segir Ingvar en Valsmönnum hefur gengið illa að undanförnu og töpuðu fyrir HK.

„Við höfum verið í ákveðnum vandræðum sóknarlega en menn verða að ýta því frá sér fyrir þennan leik. Við höfum farið vel yfir Haukaliðið og spilað við þá margoft."

Valur hefur unnið þennan titil undanfarin tvö ár og getur unnið hann þriðja árið í röð. „Við viljum alltaf meira en þessir leikir hafa hentað okkur vel undanfarin ár," segir Ingvar.