Brady í afneitun - er að verða sköllóttur

Eitt aðalefnið í slúðurdálkum bandarísku blaðanna er hárið á stórstjörnunni Tom Brady sem er leikstjórnandi New England Patriots. Brady skartar miklu faxi þessa dagana sem þykir yfirmáta hallærislegt. Svo halllærislegt reyndar að meira að segja Justin Bieber hefur gert grín að greiðslunni.

Búið er að stofna um 50 fésbókarsíður sem fjalla um hárið á honum. Það skilur einfaldlega enginn hvað þessi makki á eiginlega að þýða.

Brady er ein stærsta stjarnan í bandarísku íþróttalífi. Hæfileikaríkur og þykir þess utan vera með myndarlegri mönnum enda nældi hann sér í brasilíska ofurmódelið Gisele.

Nú hefur sannleikurinn komið í ljós. Brady er að verða sköllóttur og Gisele er allt annað en ánægð með það. Hefur hún sent Brady til sérfræðings sem á að hjálpa til við vandamálið. Þau geta illa sætt sig við þá staðreynd að Brady sé mannlegur og tapi hárum eins og annað venjulegt fólk.

Á meðan unnið er í vandamálinu safnar Brady hári svo hann geti greitt yfir skallablettina. Hann lætur þess utan vart sjá sig á almannafæri nema með derhúfu.

Bandarískir fjölmiðlar gera mikið grín að Brady þessa dagana og segja hann vera í afneitun. Þessi yfirgreiðsla blekki engan.