Fram sló út bikarmeistarana

Fram er komið í undanúrslit í Eimskipsbikar karla eftir sigur á bikarmeisturum Hauka, 32-31, í Safamýrinni í dag. Þetta var fyrsti leikurinn í átta liða úrslitum keppninnar.

Framarar voru með öruggt forskot undir lokin en Haukar áttu magnaðan endasprett og voru ekki fjarri því að tryggja sér jafntefli og framlengingu.

Haukar áttu aukakast undir lok leiksins sem Stefán Rafn Sigurmannsson kom á markið en Magnús Erlendsson varði og kom Frömurum um leið í undanúrslitin.

Mikill hiti var í mönnum eftir leikinn og þá fékk Halldór Ingólfsson, þjálfari Hauka, meðal annars að líta rauða spjaldið.