Dagur: Áttum stigið skilið

„Við unnum fyrir stiginu. Við börðumst allan leikinn og fengum það sem við áttum skilið þó svo að heppnin hafi auðvitað verið einnig á okkar bandi," sagði Dagur á fundinum í dag.

Hann var spurður um tilfinningar sínar eftir leikinn og að hafa náð stigi af löndum sínum.

„Ég var nokkuð rólegur bæði fyrir leikinn og á meðan honum stóð. En þetta var nokkuð furðulegt eftir leikinn. Þá áttaði ég mig á því að við afrekuðum eitthvað afar sérstakt," sagði Dagur.

„Þetta er frábær árangur fyrir austurríska liðið en nú er mikilvægast að snúa okkur að næsta leik sem verður gegn Serbíu."

„Ég sagði leikmönnum í morgun að það yrði erfitt eftir svona upplifun að halda einbeitingu. Nú rignir yfir þá hamingjuóskum frá fjölskyldu og vinum. Þetta er eitthvað sem ég þekki vel."

„En við verðum þó að halda áfram að bæta okkur ef við ætlum að vinna næsta leik. Serbar eru undir mikilli pressu og verða að vinna þennan leik. Þetta er því erfitt."

Sigurvegari leiksins kemst áfram í milliriðlakeppnina en Austurríki dugir jafntefli til að komast áfram. Verði niðurstaðan jafntefli þurfa Serbar að treysta á hagstæð úrslit úr leik Íslands og Danmerkur síðar um kvöldið.

Dagur segir árangur landsliðsins hafa staðfest þær væntingar sem hann gerði til liðsins þegar hann tók við þjálfun þess.

„Ég hafði alltaf trú á liðinu - annars hefði ég ekki tekið að mér starfið. Nú hef ég fengið staðfestingu minni trú vegna þess að liðið hefur verið að spila vel. Það er ekki hægt að ná svona árangri á baráttunni einni heldur verður að vera ákveðin geta til staðar einnig."

Dagur var svo spurður út í lokamínútu leiksins í gær en þá skoraði austurríska liðið þrjú mörk á 50 sekúndum.

„Það var bara ekki hægt að undirbúa sig fyrir svona lagað. Þetta er ekki eitthvað sem hægt er að taka fyrir á æfingum. Annað hvort er maður tilbúinn í svona átök eða ekki. Þess vegna er svo mikilvægt að menn haldi einbeitingunni í lagi og geri það áfram. Þetta er allt spurning um hugarfar."