Ólafur Ragnar í Davos: Engir Icesave fundir, en....

Ólafur Ragnar Grímsson forseti Íslands segir að uppsveifla hefjist á Íslandi fyrr en áætlanir gerðu ráð fyrir. Hann er nú staddur Í Davos í Sviss þar sem áhrifamestu menn heimsins í stjórnmálum og viðskiptum funda.

Í viðtali sem birtist á netútgáfu Wall Street Journal segir Ólafur að íslenskt efnahagslíf fari að sækja í sig veðrið á seinni hluta þessa árs og 2011. Ólafur bendir á að veik króna hjálpi til við að lífga við útflutningsvegina en hann undirstrikar að lykillinn að bata sé lausn á Icesave deilunni við Breta og Hollendinga.

Ólafur segist ekki hafa rætt við fulltrúa Breta og Hollendinga í Davos en bætir við: „Torgið í þessu þorpi er stórt. Það á eftir að koma í ljós hvort við hittumst í þorpinu." Davos er lítill skíðabær í svissnesku ölpunum.

Í viðalinu segir Ólafur að örlög Íslands ættu að vera öðrum þjóðum víti til varnaðar. „Ekki vegna þess að þau gætu lent í sömu vandræðum, heldur vegna þess að útbólgin bankakerfi skekkja efnahagskerfið og ræna aðra geira reyndum starfskröftum.

Ólafur segir að aðrir geirar á Íslandi hafi nú þegar hagnast á því að bankastarfsmenn misstu vinnuna í stórum stíl. „Önnur fyrirtæki náðu ekki í rétta fólkið til þess að viðhalda samkeppnishæfni sinni en þegar bankakerfið hrundi fögnuðu margir í öðrum geirum eins þversagnarkennt og það hljómar."