Veglegir styrkir til sjónvarps- og kvikmyndagerðar

Norrænu menningarmálaráðherrarnir hafa gert fimm ára samkomulag við Norræna kvikmynda- og sjónvarpssjóðinn. Samkomulagið er einn stærsti liðurinn í fjárlögum menningamálaráðherranna og mun styrkja Norðurlönd í alþjóðlegri samkeppni á sviði kvikmyndagerðar og framleiðslu sjónvarpsefnis.

Alls verður um 70 milljónum danskra kr. eða 1,6 milljarði kr. varið til þessa málaflokks á hverju ári næstu fimm árin. Þar að auki mun einni milljón danskra kr. eða tæpum 23 milljónum kr. verða varið á ári í kynningar á norrænu sjónvarpsefni og kvikmyndum.

Fjallað er um málið á vefsíðunni norden.org en þar segir að gengið hafi verið frá málinu á fundi sem haldinn var í Reykjavík. Þar undirrituðu norrænu menningarmálaráðherrarnir og fulltrúar norrænna kvikmyndastofnana og sjónvarpsstöðva á Norðurlöndum nýtt samkomulag við Norræna kvikmynda- og sjónvarpssjóðinn. Samkomulagið gildir til loka árs 2014. Fjárhagsáætlun sjóðsins verður áfram sú sama.

Katrín Jakobsdóttir ráðherra menningarmála er ánægð með samkomulagið. Hún leggur áherslu á að það sé mikilvægur þáttur í hnattvæðingarstefnu forsætis- og menningarmálaráðherranna.

„Kvikmyndir og sjónvarp eru einstakir tjáningarmiðlar. Þeir miðla annars vegar list og menningu og hins vegar eru þeir atvinnurekstur og iðnaður. Þannig verður kvikmynda- og sjónvarpsframleiðslan mikilvægur hluti í nýsköpun og skapandi iðnaði. Norðurlönd hafa hér mikilvægu hlutverki að gegna. Samkomulagið mun stuðla að því að viðhalda alþjóðlegri samkeppnishæfni þeirra á þessu sviði", segir Katrín Jakobsdóttir.

Þá er framkvæmdastjóri Norræna sjóðsins einnig ánægður. „Við getum glaðst yfir því að þrátt fyrir fjármálakreppu og niðurskurð í framlögum til menningarmála þá hefur tekist að tryggja rekstur sjóðsins með fimm ára samkomulagi...

Við teljum það vera viðurkenningu á starfi sjóðsins. Samstarfslíkanið, sem felur í sér að Norræna ráðherranefndin starfar með bæði norræna kvikmynda- og sjónvarpsgeiranum, er nefnilega einstakt á alþjóðavettvangi, en það stuðlar að því að viðhalda samkeppnishæfni og gæðum í framleiðslunni", segir Hanne Palmquist framkvæmdastjóri Norræna kvikmynda- og sjónvarpssjóðsins.