Almenningur sýni biðlund

„Það er ekki hægt að byrja á því að frysta eignir fólks, fyrst verður að sanna glæpsamlega hegðun þess," segir Eva Joly, ráðgjafi sérstaks saksóknara vegna bankahrunsins.

Hún segir almenning verða að sýna biðlund meðan málin séu rannsökuð. Afar flókið sé að ákveða hvort og hvenær eigi að frysta eignir grunaðra.

Þegar þrír nýir saksóknarar koma til starfa hjá embætti sérstaks saksóknara í haust munu þeir meðal annars hafa uppi á brottfluttu fé, með aðstoð erlendra sérfræðinga, segir Joly, í viðtali við Fréttablaðið í dag.

Joly mun funda með forstjóra bresku efnahagsbrotadeildarinnar, Serious Fraud Office, snemma í september. Hún segir Ísland og Bretland hafa sameiginlega hagsmuni af því að setja saman púsluspilið sem eftir sitji eftir bankahrunið.

Best væri ef samstarfið yrði mun víðtækara, þannig að embætti sérstaks saksóknara gæti notið reynslu og þekkingar sem til staðar er hjá bresku efnahagsbrotadeildinni, segir Joly.