Krónan heldur áfram að styrkjast

Krónan hélt áfram að styrkjast í dag og lækkaði gengisvísitalan um 1,3%. Hefur því þróunin á gjaldeyrismarkaðinum frá í síðustu viku haldið áfram að krónan styrktist um rúm 4% í síðustu viku.

Jón Bjarki Bentson hjá greiningardeild Glitnis segir aðspurður um þróunina á gjaldeyrismarkaðinum að vangaveltur hafi verið uppi í síðustu viku um inngrip af hálfu Seðlabankans.

Þær vangaveltur sem Jón Bjarki vísar hér er eru um að Seðlabankinn hefði sett eitthvað af gjaldeyrissjóði sínum inn á markaðinn til að styrkja gengi krónunnar.

Jón Bjarki nefnir einnig aðra hugsanlega skýringu sem er að útflytjendur séu í auknum mæli að setja gjaldeyri sinn á markaðinn. Skilaskylda er á gjaldeyri en ekki söluskylda. Það þýðir að þeir sem geta aflað sér gjaldeyris eru ekki neyddir til að selja hann heldur geta geymt hann í bönkunum á gjaldeyrisreikningum.

"Og á þessum reikningum eru menn ekki að fá neina vexti þannig að þeir sjá fé sitt rýrna og eru því væntanlega viljugri til að selja gjaldeyri sinn," segir Jón Bjarki.