Óskar í fjögurra manna hópi Árvakurs

Óskar Magnússon hæstaréttarlögmaður og fyrrverandi forstjóri Tryggingarmiðstöðvarinnar staðfestir í samtali við Vísi að hann fari fyrir hópi sem gert hefur tilboð í Árvakur, Útgáfufélag Morgunblaðsins. Óskar hefur ekki viljað gefa upp hverjir það eru sem standa að baki tilboðinu með sér en nú fær hópurinn aðgang að frekari gögnum frá Nýja Glitni sem er stærsti lánadrottinn útgáfufélagsins. Opnað verður fyrir þau gögn á morgun.

„Það sem gerist núna er að við fáum aðgang að frekari gögnum og tökum svo afstöðu í framhaldinu af því," segir Óskar í samtali við Vísi. Frestur til þess að skila inn skuldbindandi tilboði rennur út 17.febrúar.

Óskar er einn fjögurra aðila sem fá aðgang að umræddum gögnum og er því heimilt að gera skuldbindandi tilboð.

Hópur sem kallar sig Almenningshlutafélag um Morgunblaðið er einnig í þessum hópi en Vilhjálmur Bjarnason fjárfestir fer fyrir hópi tæplega 700 aðila sem sýnt hafa áhuga á að taka þátt í kaupum á Árvakri.

Tveir sterkefnaðir erlendir aðilar þeir, Steve Cosser og Everhard Vissers hafa einnig verið nefndir í þessu samhengi.

Árni Hauksson, sem gjarnan er kenndur við Húsasmiðjuna, og Hallbjörn Karlsson viðskiptafélagi hans hafa einnig verð nefndir en samkvæmt heimildum Vísis hættu þeir við að gera tilboð í félagið. Það hefur Hreinn Loftsson stjórnarformaður Birtíngs einnig gert.

Samkvæmt heimildum Vísis eru skuldir Árvakurs tæpir fimm milljarðar króna.