Útlendingar gera tilboð í Árvakur

Tveir útlendir fjárfestar hafa gert tilboð í Árvakur, útgáfufélag Morgunblaðsins samkvæmt heimildum fréttastofu. Félagið er sagt ramba á barmi gjaldþrots.

Það hlýtur að teljast til tíðinda komist Morgunblaðið, í hendur útlendra eigenda, en heimildir fréttastofu herma að nú í vikunni hafi tveir fjárfestar, Hollendingur og Breti, gert tilboð í Árvakur.

Staða Árvakurs, líkt og margra annarra fyrirtækja í landinu, er afar slæm, en skuldir félagsins nema um 4,5 milljörðum króna. Orðrómur er um að fyrirtækið sé í raun það illa statt að hugsanlega verði það tekið til gjaldþrotaskipta, jafnvel í kringum næstu mánaðamót. Útgáfan haldi svo áfram á nýrri kennitölu. Reynt hefur verið um tíma að fá nýja fjárfesta að fyrirtækinu og hafa margir sýnt því áhuga.

Óskar Magnússon fer fyrir hópi fólks sem hefur óskað eftir viðræðum og var bréf þess efnis sent Glitni, helsta viðskiptabanka Árvakurs, fyrir nokkru. Óskar segir að viðræður við bankann hafi verið afar óformlegar, en fjárfestahópurinn hafi enn áhuga og sé enn vilji fyrir því að selja það, telji hann vænlegast að það verði auglýst svo allir sitji við sama borð. Samkvæmt heimildum fréttastofu hafa viðræður verið við fjárfesta í bankanum, en sagt er að niðurstöðu sé að vænta um afdrif Árvakurs á allra næstu dögum.