Menntamálaráðherra vill takmarka nafnlaus ummæli á netinu

Nýtt fjölmiðlafrumvarp verður kynnt fyrir öllum þingflokkum í næstu viku og svo lagt fyrir Alþingi til umræðu. Ein af tillögunum sem finna má í frumvarpinu er ábyrgðarákvæði um nafnlaus ummæli á fréttasíðum á netinu. Fjölmiðlar eru gerðir ábyrgir fyrir nafnlausum ummælum sem birtast á vefsvæðum þeirra.

„Þetta er sem sagt ákvæði um ábyrgðaraðila sem hefur reyndar verið í prentlögum en blöð birta til dæmis ekki nafnlausa texta án ábyrgðar," segir Katrín Jakobsdóttir menntamálaráðherra um frumvarpið.

Hún segir að það sé vel þekkt að pistlar eða bréf séu birt í dagblöðum samanber Velvakandi í Morgunblaðinu eða Svarthöfði í DV. Aftur á móti eru blöðin ábyrg fyrir þessum textum. Hinsvegar hefur það tíðkast á sumum fréttasíðum á netinu að einstaklingar geti tjáð sig nafnlaust. Hingað til hafa einstaklingar þurft að kæra ummæli til lögreglunnar sem svo hefur rannsókn til þess að finna þann sem skrifaði það sem gæti hafa farið fyrir brjóstið á viðkomandi.

Það ferli er einfaldað til muna, forsvarsmenn fréttasíðnanna eru ábyrgir verði frumvarpið samþykkt óbreytt.

Aðeins Eyjan.is býður upp á þann möguleika að menn tjái sig nafnlaust undir fréttum.

Aðspurð hvort Katrín sé með þessu að takmarka tjáningarfrelsið segist hún ekki líta svo á.

„Fjölmiðlar hljóta að vera ábyrgir fyrir því sem birtist í þeim. Það er ekki verið að setja hömlur á prívat síður," segir Katrín en bloggsvæði verða á ábyrgð þess sem þar skrifar samkvæmt frumvarpinu.

Annað sem finna má í frumvarpinu eru lög um gagnsætt eignarhald. Þá er einnig í frumvarpinu ákvæði um að ritstjórnir þurfi að setja sér reglur um ritstjórnarlegt sjálfstæði.

Ekkert um eignarhald er að finna í frumvarpinu. Katrín segist vilja setja það mál í þverpólitíska nefnd þar sem það verður sérstaklega skoðað. Því má búast við að sérstök lög um það líti dagsins ljós eftir að fjölmiðlafrumvarpið hefur verið samþykkt.