Kjarvalsmálverkið var ekki fest við vegg

Málverkið eftir Jóhannes Kjarval sem stolið var á Kjarvalsstöðum í gærdag var ekki fest við vegg, segir safnstjóri. Skömmu eftir ránið voru tveir einstaklingar handteknir og síðar um daginn fannst málverkið.

„Þetta gekk mjög fljótt fyrir sig og verkið er komið í hús í góðu lagi," segir Hafþór Yngvason, safnstjóri Listasafns Reykjavíkur. Fjölmennt var á safninu þegar ránið átti sér stað.

„Það má segja að þetta hafi verið heppni hjá þeim því verkið var ekki fest upp á vegg," segir Hafþór. Nýverið opnaði sýning á nokkrum málverkum Kjarvals og var ólokið við að festa nokkur þeirra við vegg líkt og alltaf er gert.

HafÞór segir að ungt par hafi komið inn á safnið eftir klukkan tvö í gær og haft á brott með sér listaverkið Á hulduströnd eftir Kjarval. Safnvörður hafi áttað sig strax á málinu og hringt á lögreglu sem kom á staðinn. „Þeir settu allt í gang og leystu málið á punktinum. Maður getur ekki annað dáðst af þeim," segir safnstjórinn.

Í samtali við fréttastofu í morgun sagði lögregla að tveir einstaklingar hefðu verið handteknir í gær vegna málsins.

Aðspurður segir Hafþór að farið verði yfir verklag á Kjarvalsstöðum og öðrum söfnum sem heyra undir Listasafn Reykjavíkur. „Öryggiskerfið þrælvirkaði og vörðurinn gerði allt rétt en svona lagað gefur alltaf tækifæri til að fara yfir verklag."

Hafþór segir að málverkið, Á hulduströnd, sé afar merkilegt og vel þekkt. Verkið sé gott dæmi um mismunandi þætti í list Jóhannesar Kjarvals. Hafþór gat ekki upplýst hvert verðmæti málverksins sé.