Mikið forskot Fréttablaðsins í lestri

Heldur dregur úr lestri á dagblöðum í sumar samkvæmt nýrri könnun Capacent Gallup. Fréttablaðið er sem fyrr með mun meiri lestur en Morgunblaðið, og helst forskot blaðsins svo til óbreytt frá síðustu könnun.

Samkvæmt könnuninni, sem gerð var á tímabilinu 2. maí til 31. júlí, lásu 61,1 prósent hvert tölublað Fréttablaðsins að meðaltali. Það er ívið minna en í síðustu könnun, sem gerð var á tímabilinu 1. febrúar til 30. apríl, þegar lesturinn mældist 61,9 prósent.

Í könnun sem gerð var á tímabilinu maí til júlí í fyrra var meðallesturinn 64,8 prósent.

Um 39,1 prósent lásu Morgunblaðið að meðaltali samkvæmt könnuninni nú. Í síðustu könnun sögðust 40,1 prósent hafa lesið Morgunblaðið og á sama tíma í fyrra var lestur Morgunblaðsins 38,7 prósent.

Þeim sem höfðu eitthvað lesið blöðin í þeirri viku sem spurt var hafði einnig fækkað. Alls sögðust 82,7 prósent hafa lesið eitthvert Fréttablað í vikunni, en í síðustu könnun mældist lesturinn 86 prósent. Um 67,5 prósent sögðust hafa lesið Morgunblaðið eitthvað í þeirri viku sem spurt var, en í síðustu könnun var lesturinn 70,2 prósent.

Á höfuðborgarsvæðinu var lestur Fréttablaðsins samkvæmt könnuninni 73,1 prósent meðan 43,6 prósent lásu Morgunblaðið. Lestur Fréttablaðsins á höfuðborgarsvæðinu var 71,2 prósent á sama tíma í fyrra og hefur aukist um 1,9 prósentustig.

Í úrtakinu voru 4.200 manns á aldrinum 12 til 80 ára. Svarhlutfallið var 60,2 prósent. - bj