1,2 milljarðar í tap hjá Nýjerja - fjármagnsgjöld aukast verulega

Tap Nýherja á síðasta ári nemur 1.201 milljónir króna samanborið við hagnað upp á 420 milljónir árið 2007. Hrein fjármagnsgjöld voru 1.480 milljónir í samanburði við rúmlega 92 milljónir á sama tímabili árið 2007. Þetta kemur fram í árshlutauppgjöri sem birt var í dag.

Í tilkynningu frá Nýherja segir að hækkun á fjármagnsgjöldum megi rekja til 80% lækkunar krónunnar á tímabilinu og meiri skuldsetningar samstæðunnar vegna kaupa á fyrirtækjum. Í tilkynningunni kemur einnig fram að tekjur af erlendri starfsemi hafi numið 3.517 milljónum eða 24% af heildartekjum.

Þórður Sverrisson, forstjóri Nýherja segir að rekstur og afkoma Nýherja á fjórða ársfjórðungi beri merki „þeirra skyndilegu sviptinga, sem urðu í rekstrarumhverfi íslenskra fyrirtækja eftir fall bankanna í október og stórfellda lækkun á verðgildi íslensku krónunnar." Hann segir að sú skyndilega breyting sem varð á rekstrarumhverfinu á Íslandi hafi haft umtalsverð áhrif á reksturinn.

Nýherji greip í október til fjölþættra aðgerða til að lækka rekstrarkostnað og styrkja rekstur móðurfélagsins og dótturfélaga, svo sem með tilkynningu um að lækka laun starfsmanna um 10% frá 1. febrúar og slá á frest frekari verkefnum í hugbúnaðarþróun hérlendis og erlendis. „Gert er ráð fyrir að aðgerðir sem kynntar hafa verið muni leiða til yfir 600 mkr kostnaðarlækkunar í rekstri samstæðunnar á Íslandi á árinu 2009," segir einnig.