Útfluttar sjávarafurðir námu 181 milljarði í fyrra

Á árinu 2008 nam verðmæti útflutningsframleiðslu sjávarafurða 181 milljarði króna og jókst um 42,3% frá fyrra ári.

Þetta kemur fram í ritinu Útflutningur og útflutningsframleiðsla sjávarafurða 2008 sem birt hefur verið á vefsíðu Hagstofunnar.

Í ritinu kemur m.a. fram að framleiðslan mæld á föstu verði dróst hins vegar saman um 1,5%. Fluttar voru út sjávarafurðir að verðmæti 171,3 milljarðar króna og jókst verðmæti þeirra milli ára um 34,3%, en í magni um 12,5%. (Mismunur á verðmætinu skýrist af birgðum sem til voru í hitteðfyrra en seldar á næsta ári.)

Útflutt afurðaverðmæti allra aflategunda nema skel- og krabbadýrum og flatfiski jókst frá fyrra ári.

Líkt og undanfarin ár skiluðu frystar afurðir um helmingi útflutningsverðmætis. Af einstökum afurðum var verðmæti blautverkaðs saltfisks úr þorski mest, 14 milljarða króna.

Af heildarútflutningi sjávarafurða fór 79% til Evrópska efnahagssvæðisins, 6,2% til annarra Evrópulanda, 6,3% til Asíu og 5,6% til Norður Ameríku.