Lýst eftir framtíðarsýn

Útflutningsgreinar þjóðarinnar eru brothættar og svo fáar að setja má kennitölu fyrirtækja á hverja grein. Þetta segir Hermann Guðmundsson, forstjóri N1.

Hermann flutti erindi um um framtíðarsýn þjóðarinnar á hugmyndaþingi sem N1 stóð fyrir í gær undir yfirskriftinni Start.

„Erum við tilbúin fyrir framtíðina?" spurði hann og benti á að miðað við mannfjöldaþróun síðastliðin hundrað ár megi reikna með fimm til sex hundruð þúsund nýjum störfum hér á landi eftir öld. Því sé nauðsynlegt að þjóðin komi sér saman um framtíðarsýn svo hér verði ákjósanlegt að búa. Byggja verði á fleiri stoðum í útflutningi en þeim sem nú er.

Hann var sammála fjölda gesta sem sóttu fundinn að þjóðin sem slík hefði fram til þessa ekki haft neina sameiginlega sýn.

Aðrir frummælendur á fundinum voru bandaríski frumkvöðullinn Jeff Taylor og Salem Samhoud frá Hollandi. Báðir fjölluðu þeir um nauðsyn þess að leggja fram nýja framtíðarsýn fyrir þjóðina. - jab