Siggi segir góðar veðurhorfur fyrir verslunarmannahelgina

„Ég myndi segja að horfurnar séu bara nokkuð hagstæðar þó suðurhelmingur landins hafi óumdeilanlega vinninginn í veðrinu. Við erum að tala um hægan vind um mest allt land það er ákveðinn sigur. Úrkoma verður sennilega nokkur á norðurhluta landsins og þá sérstaklega seinnihluta helgarinnar. En syðra verður þurrt og bjart veður þó stöku síðdegisskúrir kunni að falla" segir Sigurður Þ. Ragnarsson veðurfræðingur Stöðvar 2 og Vísis.

Hann segir spárnar vera nokkuð samhljóma sem auki líkur á að þær rætist. „Engu að síður er þetta allt í gerjun og getur breyst eitthvað en meginlínurnar liggja að mestu fyrir" segir Sigurður.

Sigurður mun verða með uppfærðar spár klukkan 13 daglega hér á VÍSI fram að verslunarmannahelgi svo menn átti sig á hvert best sé að halda, þessa stærstu ferðahelgi ársins.

Hér koma veðurhorfur um verslunarmannahelgina - byggt á gögnum þriðjudaginn 28.7.

Föstudagur 31-júlí 2009:

Hæg norðaustlæg átt.

Léttskýjað á suðurhluta landsins en hætt við síðdegisskúrum en skýjað og víða skúrir á norðurhluta landsins. Austurlandið bjart með köflum, einkum sunnan til.

Hiti víðast 9-16 stig, svalast nyrst á Vestfjörðum en víða 14-16 stiga hiti til landsins

Laugardagur 1-ágúst-2009:

Norðaustan 5-10 m/s norðvestan til, við Breiðafjörð og úti við suðaustur- og austurströndina. Annars 3-8 m/s.

Bjartviðri sunnan- og vestan til, annars skýjað með köflum og hætt við lítilsháttar vætu á Ströndum og við norður- og austurströndina.

Hiti 10-16 stig, hlýjast suðvestanlands.

Sunnudagur 2-ágúst-2009:

Norðaustan 5-13 m/s vestast á landinu, hvassast á útnesjum annars yfirleitt 3-8 m/s.

Bjart með köflum sunnan- og suðvestanlands annars skýjað og víða rigning norðan til á Vestfjörðum, norðanlands og austan.

Hiti 8-16 stig, hlýjast á suðurlandi en svalast norðvestan til.

Mánudagur 3-ágúst-2009:

Norðaustan 5-10 á Vestfjörðum og norðvestan til annars yfirleitt hæg breytileg átt.

Bjart veður suðvestan til annars skýjað og víða einhver væta.

Hiti 10-16 stig, hlýjast suðvestan og vestan lands.