Sérstakur saksóknari hefur fengið fimm mál frá FME

Fjámálaeftirlitið hefur vísað samtals fimm málum til frekari rannsóknar hjá sérstökum saksóknara, eitt þeirra tengistt lífeyrissjóðum sem eru í rekstri og eignastýringu Landsbankans. Fréttastofa sendi FME fyrirspurn í framhaldi af því að eftirlitið og sérstakur saksóknari hafa gert með sér samkomulag um verklagsreglur sín í millum en vangaveltur hafa verið um hvort bankaleynd sem FME telur á skýrslum sínum sé aflétt að hluta með fyrrgreindu samkomulagi.

Í svari FME, sem Vísir sagði frá fyrr í dag, kom fram að eftirlitið hefur þegar sent embætti sérstaks saksóknara fjögur mál ásamt öllum þeim gögnum sem hefur veirð aflað í tengslum við þau, þar á meðal viðeigandi kafla úr skýrslunum.

Síðar í dag kom síðan tilkynning frá Landsbankanum um að mál fimm lífeyrissjóða hefðu verið send sérstökum saksóknara vegna meintra brota á fyrri hluta árs 2008.

Mál lífeyrissjóðanna fimm er flokkað sem eitt mál og því er samtals um fimm mál að ræða.

Á Vísi fyrr í kvöld var því haldið fram að um átta mál væri að ræða. Málin eru hinsvegar ekki nema fimm og leiðréttist það hér með.