Umfjöllun: Íturvaxið lið HK nældi í óvænt stig

Það voru ekki margir sem áttu von á miklu frá HK-liðinu í kvöld gegn FH. HK með mikið breytt lið en FH að tefla fram gríðarsterku liði sem er spáð góðu gengi í vetur.

Trú blaðamanns á eitthvað frá HK í leiknum fauk svo endanlega út um gluggann er hann mætti í Digranesið. Allt of margir leikmenn liðsins virkuðu í lélegu formi og að minnsta kosti fimm leikmenn liðsins voru með það sem í daglegu tali kallast einfaldlega bumba.

HK-strákarnir sýndu samt í kvöld að menn með bumbur geta vel spilað handbolta og liðið er líklega ekki í eins lélegu formi og það lítur út fyrir að vera.

HK fór samt ákaflega hægt að stað og lenti fljótlega nokkrum mörkum undir. FH spilaði hörkuvörn og Bjarni Fritzson raðaði inn mörkum úr hraðaupphlaupum. Hann stakk þunga leikmenn HK af hvað eftir annað.

Þá tók Gunnar leikhlé, róaði sína menn sem byrjuðu loks að spila handbolta og unnu sig jafnt og þétt inn í leikinn þó svo þeir væru alltaf skrefi á eftir FH.

Um miðjan síðari hálfleik komst HK síðan yfir í fyrsta skipti í leiknum, 20-19, og mínturnar sem eftir lifðu voru æsispennandi. Liðin skiptust á hafa forystuna og bæði lið voru líkleg til að stela sigrinum.

HK nýtti síðustu sóknina sína vel og Vilhelm Gauti Bergsveinsson jafnaði metin með stórglæsilegu marki þegar tvær sekúndur voru eftir af leiknum. 28-28 sem var sanngjörn niðurstaða.

Frábær endurkoma hjá Vilhelm sem er nýbúinn að taka skóna fram á nýjan leik en þeir hafa safnað ryki í hillunni góðu í nokkur ár. Vilhelm virkaði oft þreyttur en barðist vel og skilaði sínu á báðum endum vallarins.

FH-liðið olli miklum vonbrigðum í þessum leik. Liðið byrjaði af krafti en svo slökuðu leikmenn á og virtust ætla að taka leikinn með "vinstri" eins og oft er sagt. Það má ekki gegn baráttuglöðu liði HK.

Bjarni Fritzson átti magnaðan leik hjá FH og virkar í fantaformi. Ólafur Guðmundsson var sterkur en nafni hans Gústafsson var slakur rétt eins og Ásbjörn. Pálmar varði vel í fyrri hálfleik en náði ekki að fylgja því eftir í síðari hálfleik og munaði um minna.

Valdimar Þórsson var magnaður í liði HK. Lengi í gang en óstöðvandi síðasta stundarfjórðunginn þar sem hann skoraði hvert glæsimarkið á fætur öðru. Það endaði allt í netinu hjá honum.

Sveinbjörn magnaður í markinu og Sverrir Hermannsson gríðarlega drjúgur í síðari hálfleik. Línumaðurinn Atli Ævar sýndi svo góða takta en þar fer greinilega sterkur leikmaður.

Gunnar Magnússon getur verið ánægður með strákana sína sem blésu á allar hrakspár, sýndu mikinn karakter og baráttuvilja og uppskáru eins og þeir sáðu. Þeir gáfu allt sem þeir áttu í leikinn og það sem meira er þá þurftu þeir ekkert súrefni í leikslok eftir allan hasarinn.

Flott frammistaða og verður áhugavert að fylgjast með HK í vetur en FH þarf að girða sig í brók ætli liðið að ná markmiðum sínum.

HK-FH 28-28 (12-14)

Mörk HK (skot): Valdimar Þórsson 7 (15/1), Sverrir Hermannsson 6 (13), Atli Ævar Ingólfsson 4 (5), Ragnar Hjaltested 3 (4), Bjarki Már Gunnarsson 3 (3), Vilhelm Gauti Bergsveinsson 3 (4), Hákon Bridde 1 (3), Jón Björgvin Pétursson 1 (1).

Varin skot: Sveinbjörn Pétursson 17/1 (55/3) 31%.

Hraðaupphlaup: 6 (Bjarki 3, Valdimar, Ragnar, Hákon).

Fiskuð víti: 1 (Atli).

Utan vallar: 6 mínútur.

Mörk FH (skot): Bjarni Fritzson 11/2 (14/3), Ólafur Guðmundsson 9 (14), Ólafur Gústafsson 3 (6), Ásbjörn Friðriksson 2 (4), Jón Heiðar Gunnarsson 2 (2), Guðmundur Pedersen 1 (4).

Varin skot: Pálmar Pétursson 14/1 (52/1) 27%.

Hraðaupphlaup: 9 (Bjarni 6, Ólafur Gúst., 2, Jón).

Fiskuð víti: 3 (Bjarni, Ásbjörn, Ólafur Gúst.)

Utan vallar: 8 mínútur.

Dómarar: Gísli Hlynur Jóhannsson og Hafsteinn Ingibergsson, ágætir en nokkuð mistækir á köflum.