HM-samantekt: Ótrúlegur sigur Dana

Danir unnu hádramatískan sigur á Serbum á öðrum keppnisdegi heimsmeistaramótsins í handknattleik sem fer fram í Króatíu.

Heimsmeistarar Þjóðverja unnu sinn fyrsta leik á mótinu er þeir unnu lið Túnis. Svíar unnu einnig góðan sigur á Suður-Kóreu sem komu mörgum á óvart með því að standa í gestgjöfunum í opnunarleik mótsins.

Vísir tekur hér saman úrslit dagsins. 24 lið eru mætt til leiks í Króatíu og keppa í fjórum sex liða riðlum. Þrjú efstu liðin í hverjum riðli komast áfram í milliriðla og taka með sér stigin sem þau fengu gegn öðrum liðum sem einnig komust áfram upp úr riðlinum.

Liðin úr A- og B-riðlum fara í fyrri milliriðilinn og liðin úr C- og D-riðlunum í þann síðari. Tvö efstu liðin úr hvorum milliriðli komast í undanúrslit mótsins.



A-riðill:

Úrslit:

Ástralía - Slóvakía 12-47

Rúmenía - Ungverjaland 27-30

Argentína - Frakkland 26-33

Staðan:

Slóvakía 4 stig (+37 í markatölu)

Ungverjaland 4 (+27)

Frakkland 4 (+17)

Argentína 0 (-9)

Rúmenía 0 (-13)

Ástralía 0 (-59)

Ungverjaland vann mikilvægan sigur á Rúmenum þar sem þessi lið, ásamt Slóvakíu, koma til með að berjast um að komast áfram í milliriðilinn með Frökkunum. Þá vann Slóvakía léttan sigur á Ástralíu og Frakkar sigruðu Argentínumenn.

Þetta er þó ekki búið spil hjá Rúmenum - þeir verða að vinna Slóvaka og treysta því að Ungverjar vinni helst Slóvaka líka.

B-riðill:

Úrslit:

Kúba - Spánn 20-45

Suður-Kórea - Svíþjóð 25-31

Kúveit - Króatía 21-40

Staðan:

Spánn 4 stig (+55 í markatölu)

Svíþjóð 4 (+33)

Króatía 4 (+20)

Suður-Kórea 0 (-7)

Kúveit 0 (-49)

Kúba 0 (-52)

Suður-Kóreumenn komu skemmtilega á óvart í opnunarleik mótsins er þeir töpuðu fyrir heimamönnum í Króatíu með aðeins eins marks mun. Þeir þóttu sýna fína takta gegn Svíum í dag en urðu þó að játa sig sigraða. Svíarnir voru einfaldlega of sterkir og innbyrtu góðan sex marka sigur eftir að hafa verið með fjögurra marka forystu í hálfleik.

Spánverjar og Króatar unnu auðvelda sigra og staðan orðin vænleg fyrir Evrópuliðin í riðlinum.

C-riðill:

Úrslit:

Alsír - Makedónía 19-32

Túnis - Þýskaland 24-26

Rússland - Pólland 22-24

Staðan:

Pólland 4 stig (+19 í markatölu)

Þýskaland 3 (+2)

Makedónía 2 (+12)

Túnis 2 (-1)

Rússland 1 (-2)

Alsír 0 (-30)

Heimsmeistarar Þjóðverja unnu sinn fyrsta leik í dag eftir að hafa gert jafntefli við Rússa í fyrsta leik. Þjóðverjar unnu Túnisa sem lögðu Makedóníu í gær og var því búist við spennandi leik.

Túnis byrjaði miklu mun betur í leiknum og komst í 6-1 forystu en Þjóvðerjar náðu að jafna metin eftir 25 mínútur, 10-10. Leikurinn var í járnum þar til á síðustu tíu mínútunum að Þjóðverjar sigu fram úr og unnu góðan sigur, 26-24.

Það voru einnig góðar fréttir að Mimi Kraus gat spilað með Þjóðverjum í dag þrátt fyrir meiðslin en hann spilaði ekki í gær. Hann skoraði þrjú mörk í dag.

Pólverjar unnu góðan sigur á Rússum og eru því á toppi riðilsins með fullt hús stiga. En Rússar eru nú búnir með tvo erfiðustu andstæðingana og er víst að þeir munu nú klífa upp töfluna.

Makedónía, liðið sem sló út Ísland í undankeppninni fyrir mótið, átti náðugan dag og vann léttan sigur á Alsír.

D-riðill:

Úrslit:

Brasilía - Noregur 21-39

Sádí-Arabía - Egyptaland 18-26

Serbía - Danmörk 36-37

Staðan:

Noregur 4 stig (+34 í markatölu)

Danmörk 4 (+14)

Serbía 2 (+7)

Egyptaland 2 (0)

Sádí-Arabía 0 (-24)

Brasilía 0 (-31)

Sigur Dana á Serbum var ótrúlegur. Fyrir það fyrsta höfðu Serbar sjö marka forystu í síðari hálfleik, 30-23, en Danir neituðu að gefast upp, jöfnuðu metin og tryggðu sér sigurinn þegar þrjár sekúndur voru eftir af leiknum.

Það var Lasse Boesen sem tryggði Dönum sigurinn með langskoti og út brutust gríðarleg fagnaðarlæri.

Þetta var gríðarlega mikilvægur sigur hjá Evrópumeisturunum þar sem það verður að teljast líklegt að þessi tvö lið, ásamt Norðmönnum, fara áfram í milliriðilinn.

Norðmenn unnu léttan sigur á Brasilíu og Egyptar þurftu ekki að hafa mikið fyrir sínum sigri á Sádí-Arabíu.