Upplýsa um samskipti við grannþjóðir

Utanríkisráðherra og fjármálaráðherra koma á fund utanríkismálanefndar Alþingis á mánudag og fjalla um samskipti íslenskra stjórnvalda við stjórnvöld í nágrannalöndunum vegna Icesave.

Ekki hefur enn fundist lausn á Icesave-deilunni sem samstaða er um innan stjórnarliðsins en þingmenn, ráðherrar og embættismenn hafa unnið að því þrotlaust síðustu daga og vikur.

Víst er að Alþingi mun setja fyrirvara við frumvarpið um ríkisábyrgð vegna Icesave-samninganna en deilt er um hversu langt á, og hægt sé, að ganga.

Þá eru uppi mismunandi sjónarmið um hversu sterka fyrirvara þarf í raun að setja um endurupptöku samningsins ef efnahagslegar aðstæður breytast til hins verra. Þeim sjónarmiðum hefur verið hreyft innan fjárlaganefndar að ákvæði í samningunum sjálfum geri einmitt ráð fyrir endurupptöku við slíkar aðstæður.

Enn er með öllu óvíst hvenær fjárlaganefnd lýkur meðferð sinni um Icesave-málið.

Þingfundur verður á mánudag eftir nokkurt hlé. Enn er óvíst hver dagskrá fundarins verður en þrjátíu mál bíða meðferðar þingsins.- bþs