Taka Haukar sæti Nordhorn?

Sú staðreynd að þýska handboltaliðið Nordhorn hefur farið fram á greiðslustöðvun gæti þýtt áframhaldandi þátttöku fyrir Hauka í Evrópukeppninni.

Þetta segir yfirmaður keppnismála hjá handknattleikssambandi Evrópu.

Haukar mættu Nordhorn í tveimur leikjum ytra um helgina í 16 liða úrslitum EHF bikarkeppninnar og töpuðu Íslandsmeistararnir báðum leikjunum með samanlagt 30 marka mun.

Aðeins nokkrum klukkutímum eftir síðari leik liðanna fór Nordhorn fram á greiðslustöðvun en félagið skuldar eina milljón evra eða tæpar 150 milljónir króna.

Markus Glaser, yfirmaður keppnismála hjá evrópska handknattleikssambandinu sagði í samtali við fréttastofu í dag að Nordhorn væri enn ekki formlega komið í greiðslustöðvun.

Sambandið biði nú frétta frekari frétta af fjármálum félagsins en aðspurður sagði hann möguleika á að Haukar tækju sæti þýska liðsins í 8 liða úrslitum keppninnar verði Nordhorn vikið úr keppni. Það gæti skýrst síðar í þessari viku.

Glaser tók þá fram að það væri í valdi sambandsins að ákveða hvaða lið tæki pláss Nordhorn, taki liðið ekki þátt í næstu umferð.

Haukar seldu Nordhorn heimaleikinn sinn fyrir rimmu liðanna og sagði Aron Kristjánsson þjálfari Hauka að þýska félagið væri búið að gera upp við Hauka að stærstum hluta.