Stjörnuliðin í NBA klár

Nú er búið að velja úrvalslið austurs og vesturs fyrir stjörnuleikinn árlega í NBA deildinni sem fram fer í Phoenix þann 15. febrúar.

Fyrir nokkrum dögum voru byrjunarliðin kynnt en þau eru valin eftir kosningu NBA aðdáenda um heim allan.

Jafnan ríkir meiri eftirvænting þegar kemur að valinu á varamönnum stjörnuliðanna en þar eru það þjálfarar í deildinni sem sjá um valið.

Það sem vakti mesta athygli að þessu sinni var að Shaquille O´Neal hjá Phoenix var valinn í stjörnuliðið í 15. sinn á ferlinum, en framherjinn Carmelo Anthony hjá Denver hlaut ekki náð fyrir augum þjálfara - en hann hefur reyndar átt við meiðsli að stríða að undanförnu.

Framherjinn David West hjá New Orleans var nokkuð óvænt tekinn inn í liðið í stað Anthony, en hann er með öllu lakari tölfræði en á síðustu leiktíð.

Spútniklið Orlando Magic fékk alls þrjá fulltrúa í lið austurstrandarinnar, þá Dwight Howard sem var í byrjunarliðinu og svo Jameer Nelson og Rashard Lewis.

Meistarar Boston fá tvo fulltrúa í stjörnuleikinn að þessu sinni, þá Paul Pierce og Kevin Garnett, sem er í byrjunarliðinu.

Chauncey Billups er eini fulltrúi Denver Nuggets í leiknum en hann hefur átt stóran þátt í góðu gengi liðsins í vetur.

Kobe Bryant og Paul Gasol eru fulltrúar LA Lakers í leiknum.

Nokkrir sterkir leikmenn þurftu að bíta í það súra epli að fá ekki að taka þátt í stjörnuleiknum að þessu sinni. Hér er bæði um að ræða menn sem hafa verið fastagestir í leiknum undanfarin ár eins og Steve Nash hjá Phoenix og Vince Carter hjá New Jersey.

Ekkert pláss var fyrir þá Rajon Rondo og Ray Allen hjá meisturum Boston og heldur ekki Al Jefferson hjá Minnesota, Deron Williams hjá Utah Jazz, Mo Williams hjá Cleveland og Hedo Turkoglu hjá Orlando Magic.

Vesturliðið:



G Chris Paul, NO*

G Kobe Bryant, LAL*

F Tim Duncan, SA*

F Amare Stoudemire, PHO*

C Yao Ming, HOU*

F Dirk Nowitzki, DAL

F Pau Gasol, LAL

G Chauncey Billups, DEN

G Tony Parker, SA

G Brandon Roy, POR

C Shaquille O'Neal, PHO

F David West, NO

Austurliðið:

G Dwyane Wade, MIA*

G Allen Iverson, DET*

F Dwight Howard, ORL*

F LeBron James, CLE*

C Kevin Garnett, BOS*

F Paul Pierce, BOS

C Chris Bosh, TOR

G Joe Johnson, ATL

F Danny Granger, IND

G Devin Harris, NJ

F Rashard Lewis, ORL

G Jameer Nelson, ORL

*- Byrjunarliðsmaður

G- Bakvörður

F- Framherji

C- Miðherji