Telur hættu á fólksflótta síst ofmetna

Höskuldur Þór Þórhallsson, þingmaður Framsóknarflokksins, telur þær tölur sem nefndar hafa verið um mögulega fólksflutninga vegna kreppunnar síst ofætlaðar.

„Ég vona að þetta verði ekki jafn slæmt og hjá Færeyingum á sínum tíma en ég held að þær tölur sem nefndar hafa verið séu varlega áætlaðar. Þetta gæti orðið verulegt vandamál."

Hagfræðistofnun Háskóla Íslands hefur varað við því að fólksflótti í stórum stíl gæti aukið skuldabyrðar þeirra sem eftir eru. Stefán Ólafsson, prófessor í félagsfræði, sagði í Fréttablaðinu í gær að allt að tíu þúsund manns gætu flutt úr landi umfram aðflutta vegna kreppunnar. Það væri blóðtaka fyrir samfélagið en ekki reiðarslag.

Höskuldur Þór óttast að þær tölur gætu orðið hærri og segir Icesave-samninginn eins og hann liggur fyrir helsta ógnvaldinn.

„Við [í Framsóknarflokknum] erum afar ósátt við að fallast á Icesave-samningana eins og þeir líta út í dag. Því meiri sem skuldabyrðin er því erfiðara verður að endurreisa atvinnulífið. Og ef ríkið hefur ekki bolmagn til að fara út í framkvæmdir þá verður allt stopp."

Þá sé kominn sterkur hvati fyrir fólk að líta út fyrir landsteinana. „Það er ljóst að ef við höfum ekki vinnu fyrir vel menntað ungt fólk leitar það út, bæði til að fá vinnu við sitt hæfi og til að borga niður skuldir."

Árni Páll Árnason félagsmálaráðherra segir stjórnvöld vera á varðbergi gagnvart mögulegum fólksflutningum af völdum kreppunnar og ýmislegt hafa verið gert til að koma til móts við þann hóp sem ber mestu skuldabyrðarnar.

„Við hækkuðum til dæmis vaxtabætur um 70 prósent á þessu ári, en þær gagnast helst þeim sem bera mestu skuldabyrðarnar. Við komum líka til móts við skuldug heimili öðruvísi en áður var. Í síðustu kreppu steyptist fólk í gjaldþrot og þurfti að flýja land í kjölfarið. Nú erum við að búa til leiðir fyrir fólk að takast á við minnkandi greiðslugetu án þess að verða gjaldþrota, til dæmis með því að greiða fyrir því að bankar taki á ofveðsetningum með mildari höndum og með greiðsluaðlögun."

Árni Páll telur það einföldun hjá Höskuldi að Icesave-samningurinn sé mesti ógnvaldurinn.

„Það má þvert á móti segja að óvissan um viðskiptasambönd erlendis sé helsti ógnvaldurinn. Þess vegna er mikilvægt að eyða henni með samkomulagi um Icesave. Í kjölfarið er brýnasta verkefnið að skapa tiltrú á efnahagslega framtíð þjóðarinnar; bæði til að sannfæra fólk um að það geti átt hér gott líf áfram og tryggja að þeir sem fara utan sjái sér hag í að flytja aftur heim síðar." bergsteinn@frettabladid.is