íslenskir embættismenn hunsuðu slæma stöðu bankanna

Miklir vankantar voru á viðbrögðum Breska fjármálaráðuneytisins við falli íslensku bankanna en íslenskir embættismenn voru óskýrir, mótsagnakenndir og langt frá því að vera nógu samvinnuþýðir í samningaumleitunum við bresk yfirvöld. Þetta segja tveir breskir lögfræðingar í viðtali við breska blaðið Daily Telegraph.

Einn fulltrúi breska fjármálaráðuneytisins segir í viðtali við blaðið, að Íslendingar hafi verið mótsagnakenndir og lítt trúverðugir. Í fjölmörgum bréfaskriftum á milli leiðtoga þjóðanna síðan snemma á árinu 2008, hafi Íslendingar átt í erfiðleikum með að útskýra sín sjónarmið og hreinlega virst ólíklegir til að standa í skilum við skuldbindingar sínar gagnvart Icesave innstæðum Breta, ef bankarnir lentu í vanda. Viðskiptabankarnir þrír urðu síðan allir gjaldþrota í í okóber síðastliðnum eins og alþjóð veit.

Bretar efast um að aðgerðir Íslendinga, um að hygla íslenskum innstæðueigendum umfram aðra kröfuhafa föllnu bankanna sé lögleg. Einnig er tekið fram að aðgerðir Breta um að frysta eignir Landsbankans í Bretlandi hafi verið lögmætar, þó deila megi um það.

Í einu bréfi sem gekk á milli embættismanna Breta og Íslendinga, kemur ótti breskra yfirvalda bersýnilega fram. Það bréf barst Íslendingum í ágúst 2008, tveimur mánuðum fyrir bankahrun, en þá óttaðist breska fjármálaráðuneytið að Íslendingar gætu ekki staðið við skuldbindingar sínar vegna Icesave innstæðna. Á þessum tíma var skuldatryggingarálag á íslensku bankana verulega hátt og allmargir farnir að óttast um framtíð þeirra. Íslensk stjórnvöld virtust hins vegar hunsa allar fréttir um neikvæðar horfur bankanna.

Tveir lögfræðingar í London segja að aðgerðir Breta, um að frysta eignir Landsbankans hafi verulega annmarka en Bretar færa rök fyrir því að með aðgerðunum hafi þeir komið í veg fyrir bankaáhlaup, sem og mismunun innstæðueigenda á Íslandi og Bretlandi.

Að auki kemur fram að breka fjármálaráðuneytið hafi margoft komið áhyggjum sínum á framfæri við íslensk stjórnvöld á árinu 2008.