Fulltrúar Samkeppniseftirlitsins hættir í stjórn Tals

Stjórnarmenn sem Samkeppniseftirlitið tilnefndi í stjórn IP fjarskipta, eða Tals, þann 6. febrúar síðastliðinn hafa báðir sagt sig úr stjórninni. Þeir Þórhallur Örn Guðlaugsson og Hilmar Ragnarsson tóku sæti í stjórninni í stað fulltrúa Teymis að kröfu Samkeppniseftirlitsins.

Þeir hafa nú nokkrum dögum síðar sagt sig úr stjórn félagsins og segir Þórhallur í samtali við fréttastofu að ekki sé vænlegt til árangurs að fá utanaðkomandi stjórnarmenn inn í fyrirtækið þar sem deilur í hluthafahópnum skyggi á eðlilegan rekstur félagsins.

„Við erum búnir að senda úrsagnarbréfið til þeirra sem eftir eru í stjórninni," segir Þórhallur Örn Guðlaugsson. „Samkeppniseftirlitið biður okkur upphaflega um að taka sæti í stjórn félagsins vegna meintra samkeppnislagabrota," segir Þórhallur. „Við komum í stjórnina á föstudegi og erum alla helgina að skoða málin og átta okkur á aðstæðum." Að sögn Þórhalls hélt sú vinna áfram á mánudag og þriðjudag.

„Það varð einfaldlega okkar niðurstaða að þetta væri verkefni, sem væri ekki hægt að ætlast til að við, sem utanaðkomandi stjórnarmenn, tækjumst á við," segir Þórhallur. Þeir skiluðu greinargerð um málið um leið og þeir tilkynntu um úrsögn sína. „Við sögðum okkur þess vegna úr stjórninni og beindum því til Samkeppniseftirlitsins að það væri þeirra að bregðast við."

Að sögn Þórhalls voru þeir Hilmar fengnir inn í stjórn fyrirtækisins til þess að stýra félaginu í daglegum rekstri. „En við sáum það snemma að orkan var að beinast í aðra átt. Þar með var ekki það gagn af þessu fyrirkomulagi sem í rauninni var lagt af stað með upphaflega."

Þórhallur segir deilur í eigendahópnum hafi verið of fyrirferðarmiklar í stjórninni. „Við töldum því ekki ástæðu til þess að flækjast inn í þær."

Þórhallur segir að með afsögninni séu þeir Hilmar ekki að taka afstöðu til þess hver fari með rétt mál í deilunni. „Alls ekki. Þess vegna viljum við fara svona snemma út úr þessu. Við töldum einfaldlega rétt að Samkeppniseftirlitið fengi strax þau skilaboð að þessi tilhögun væri ekki líkleg til árangurs," segir hann að lokum.

Ekki náðist í Pál Gunnar Pálsson, forstjóra Samkeppniseftirlitsins.