Eigandi gúmmíbátsins: Ekkert leyndarmál í þessu

„Það er ekkert leyndarmál í þessu og hefur aldrei verið. Ég fór strax sama kvöld og þetta gerðist upp á lögreglustöð og sýndi öll mín gögn," segir Sigurður Örn Sigurðsson sem átti gúmmíbátinn sem notaður var til þess að sigla út í Papey til þess að sækja eiturlyf þann 20. apríl síðastliðinn. Sigurður segist hafa leigt bátinn á þeim forsendum að verið væri að fara að nota hann í árlega ferð sportkafarafélagsins í Ísafjarðardjúp. Sigurður er skoðunarmaður í félagi sem tveir aðilar sem sitja í gæsluvarðhaldi vegna Papeyjarmálsins svokallaða eru stjórnarmenn í.

Sigurður segir að allt frá því að málið kom upp hafi hann viljað hafa allt sitt á hreinu gagnvart lögreglu. „Ég er svo búinn að vera að vinna í því ásamt mínum lögfræðingi að fá bátinn úr vörslu lögreglu," segir Sigurður sem vonast til þess að fá bátinn í hendurnar sem fyrst enda hafi hann orðið fyrir fjárhagslegu tjóni vegna þessa. „Ég var með bátinn á sölu fyrir þennan tíma. Þannig að þetta er mjög óheppilegt fyrir mig í alla staði."

Sigurður er sem fyrr segir skoðunarmaður í félagi sem ber nafnið Shark ehf. Stjórnarmaður í því félagi er Árni Hrafn Ásbjörnsson sem gripinn var um borð í skútunni Sirtaki sem talin er hafa flutt eiturlyfin til Papeyjar frá Hollandi. Í framkvæmdastjórn sama félags situr Jónas Árni Lúðvíksson sem grunaður er um að hafa siglt á gúmmíbátnum út í Papey til móts við skútuna. Aðspurður hvort hann hafi mætt tortryggni hjá Lögreglu vegna tengsla sinna við þessa aðila segir Sigurður svo ekki vera. „Nei alls ekki, þetta liggur alveg ljóst fyrir. Þetta lítur ekki vel út, ég viðurkenni það. Þetta er auðvitað vinur minn [Jónas Árni, innsk.blm] sem leigir bátinn af mér til þess að fara að kafa að því er ég hélt. Hann var í Sportkafarafélaginu svo mér fannst það ekkert ótrúlegt," segir Sigurður en Jónas Árni mun hafa sagst ætla að nota hann til köfunar í Ísafjarðardjúpi. „Það var bara verið að segja mér ósatt. Hann bara lýgur þarna að mér."

Sigurður segist lítið hafa viljað tjá sig um málið hingað til. Enda sé það sorglegt og harmleikur fyrir aðstandendur þeirra manna sem í það eru flæktir.