Bankarnir fengu leyfi til að ræða saman

Bankarnir óskuðu eftir leyfi Samkeppniseftirlitsins í haust til að ræða saman um aðgerðir til að koma til móts við fjölskyldur og fyrirtæki sem eiga í vandræðum með afborganir lána sinna. „Það var leyft að bera saman bækur sínar," segir Finnur Sveinbjörnsson, forstjóri Nýja Kaupþings.

Heimilin eru skuldsett og vanskil í bankakerfinu að aukast, sérstaklega hafa íbúðalán í erlendri mynt reynst þungur baggi.

„Allir reyna að finna réttláta og sanngjarna lausn. Skuldirnar gufa ekkert upp við það að Íbúðalánasjóður taki lánin yfir. Það þarf að átta sig á því hvernig best er að gera þetta óháð því hver lánveitandinn er," segir Finnur.

Enginn tímarammi liggur fyrir en Finnur er bjartsýnn á að lausn finnist. - ghs