Efnahagsbrotadeild ekki beðið um gögn frá Fons

4. júní 2009 08:29

Efnahagsbrotadeild Ríkislögreglustjóra hefur ekki beðið um bókhaldsgögn frá þrotabúi Fons, sem var eigu Pálma Haraldssonar. Fons lék lykilhlutverk í kaupunum á danska flugfélaginu Sterling. Efnahagsbrotadeildin rannsakar nú þátt Hannesar Smárasonar í kaupunum og framkvæmdi þrjár húsleitir í gær.

Óskar Sigurðsson, skiptastjóri þrotabús Fons, staðfesti við fréttastofu í gærkvöld að efnahagsbrotadeildin hefði ekki beðið um nein bókhaldsgögn tengd kaupum eða sölu Fons á Sterling árið 2005.

Helgi Magnús Gunnarsson, saksóknari efnahagsbrotadeildarinnar, sagði í viðtali við danska blaðið Berlingske Tidende í gærkvöld að meðal þess sem verið væri að rannsaka væri meint 46 milljón dollara (um fimm milljarða) lán til félags í eigu Hannesar í Lúxemburg til að liðka fyrir kaupum Pálma á Sterling á vormánuðum 2005.

Fons keypti Sterling á fimm milljarða vorið 2005. Sex mánuðum seinna keypti FL Group Sterling á fimmtán milljarða. Ári seinna var svo félagið brætt inn í Northern Travel Holding. Verðmæti þá var tuttugu milljarðar.

Tengdar fréttir

Steingrímur fagnar vasklegri framgöngu

„Ég fagna því að rannsóknarmenn séu að ganga vasklega til verks í þessum málum. Það hefur verið mikil eftirspurn eftir því að þessari rannsóknarvinnu miðaði áfram,“ segir Steingrímur J. Sigfússon fjármálaráðherra. Efnahagsbrotadeild ríkislögreglustjóra og fulltrúar á vegum sérstaks saksóknara vegna bankahrunsins gerðu í gær húsleit hjá lögmannastofunni Logos.

4. júní 2009 08:30

Húsleit hjá Hannesi Smárasyni

Efnahagsbrotadeild ríkislögreglustjóra gerði húsleit að Fjölnisvegi 9 og 11 í morgun en þau hús eru skráð á eiginkonu Hannesar Smárasonar annarsvegar og hinsvegar á eignarhaldsfélag sem er í eigu Hannesar. Einnig var gerð húsleit hjá lögfræðistofunni Logos í tengslum við málið.

3. júní 2009 14:15

Meint ólöglegt lán rannsakað

Efnahagsbrotadeild ríkislögreglustjóra rannsakar meint ólöglegt fimm milljarða króna lán FL Group til Hannesar Smárasonar, fyrrum forstjóra félagsins. Lánið er talið hafa verið notað til kaupa á Sterling-flugfélaginu árið 2005. Einnig er til rannsóknar hvort Hannes hafi orðið uppvís af umboðssvikum.

4. júní 2009 06:00

Mest lesið

Fleiri fréttir