Steingrímur fagnar vasklegri framgöngu

„Ég fagna því að rannsóknarmenn séu að ganga vasklega til verks í þessum málum. Það hefur verið mikil eftirspurn eftir því að þessari rannsóknarvinnu miðaði áfram," segir Steingrímur J. Sigfússon fjármálaráðherra. Efnahagsbrotadeild ríkislögreglustjóra og fulltrúar á vegum sérstaks saksóknara vegna bankahrunsins gerðu í gær húsleit hjá lögmannastofunni Logos.

Steingrímur segir það vonandi boða gott að tvisvar á stuttum tíma hafi verið gripið til víðtækra rannsóknaraðgerða á þessum málum. „Ekki veitir af. Það er bráðnauðsynlegur hluti þess að þjóðin sættist við þetta að ekkert sé undan dregið í þessum efnum," segir Steingrímur.

Húsleitin er meðal annars talin tengjast meintu ólöglegu risaláni FL-Group upp á 46 milljónir dollara, eða fimm milljarða króna, til Hannesar Smárasonar, fyrrum forstjóra FL Group. Lánið á að hafa verið notað til kaupanna á Sterling-flugfélaginu árið 2005. Einnig er til rannsóknar hvort Hannes hafi orðið uppvís af umboðssvikum. Þetta kemur fram í viðtali vefútgáfu danska dagblaðsins Berlingske Tiderne við Helga Magnús Gunnarsson, saksóknara efnahagsbrotadeildarinnar. Logos kom mikið að Sterling í gegnum FL Group.

Efnahagsbrotadeildin gerði einnig húsleit á tveimur heimilum Hannesar Smárasonar við Fjölnisveg. Rannsóknin tengist meintum skattalagabrotum nokkurra félaga sem tengjast Hannesi Smárasyni. Félögin eru FI fjárfestingar ehf., sem áður var Fjárfestingarfélagið Primus, og dótturfélög þess, EO eignarhaldsfélag ehf., sem áður var Oddaflug, Eignarhaldsfélagið Sveipur ehf., 3S ehf., Hlíðarsmári 6 ehf. og Fjölnisvegur 9 ehf.

Gunnar Sturluson, faglegur stjórnandi Logos, sat í stjórnum félaganna sem tengjast Hannesi fram í lok nóvember síðastliðinn. Rannsóknin er á frumstigi.

Gunnar Sturluson staðfesti í samtalið við Fréttablaðið að húsleitin hefði farið fram og afhent hefðu verið þau gögn sem beðið var um. Hann vildi ekki tjá sig nánar um málið að svo stöddu.

Ekki náðist í Hannes Smárason vegna málsins.kjartan@frettabladid.is