Veigar sagður aftur á leið til Stabæk

Veigar Páll Gunnarsson var sagður í norskum fjölmiðlum í gærkvöldi aftur á leið til norska úrvalsdeildarfélagsins Stabæk þar sem hann lék í fimm ár.

Veigar Páll var seldur frá Stabæk til Nancy í frönsku úrvalsdeildinni en þar hefur hann afskaplega lítið fengið að spila.

Hann hefur ekkert komið við sögu á leiktíðinni og hefur ekki verið í leikmannahópnum síðan um miðjan ágúst.

Hann fékk einn leik í byrjunarliði Nancy í fyrra og kom fjórum sinnum inn á sem varamaður.

Jim Solbakken, umboðsmaður Veigars Páls, sagði að verið væri að vinna að því að finna lausn en Veigar Páll hefur áður sagt að hann væri til í að skoða það að fara aftur til Noregs.

Tom Schelvan, framkvæmdarstjóri Stabæk, segir þó enga peninga til í leikmannakaup og er því verið að skoða þann möguleika að fá Veigar Pál frítt frá Nancy.