Vitali Klitschko: Haye er of hræddur til að mæta okkur bræðrunum

WBC-þungavigtarmeistarinn Vitali Klitschko hefur svarað Bretanum málglaða David Haye fullum hálsi eftir að hann bakkaði út úr bardaga við bæði sig og bróður sinn Wladimir Klitschko.

Haye bar við meiðslum þegar hann átti að mæta Wladimir en samningar náðust ekki á milli hans og Vitali þar sem Haye sakaði eldri bróðurinn um að vera allt of gráðugan.

Vitali Klitschko segir Haye hins vegar einfaldlega vera hræddann og að hann hafi valið auðveldu leiðina út.

„Hann er bara hræddur. Þess vegna valdi hann að berjast við [Nikolai] Valuev um WBA-meistarabeltið í stað þess að mæta mér eða Wladimir," segir Vitali Klitschko sem mætir Bandaríkjamanninum Chris Arreola í hringnum í lok september.