Ræða þarf við Hollendinga og Breta vegna fyrirvara Alþingis

Stjórnvöld munu þurfa að ræða við Hollendinga og Breta, vegna þeirra fyrirvara sem Alþingi gerir við ríkisábyrgð á Icesave reikningum Landsbankans. Þetta segir fulltrúi Vinstri- grænna í fjárlaganefnd. Engin niðurstaða varð um fyrirvara á fundi nefndarinnar í morgun.

Fulltrúar í fjárlaganefnd Alþingis komu saman í morgun og ræddu Icesave málið. Engin niðurstaða varð af fundi nefndarinnar, en stjórnarliðar í nefndinni hafa reynt að ná þverpólitískri sátt um málið. Það tókst ekki í morgun, en Guðbjartur Hannesson, formaður nefndarinnar og fulltrúi Samfylkingarinnar, segir að vinnudrög um fyrirvara verði rædd í þingflokkum í dag.

Stjórnarandstaðan virðist vera á því að máli að semja þurfi upp á nýtt. Árni Þór Sigurðsson, fulltrúi Vinstri grænna í fjárlaganefnd, telur að allir vilji finna lausn á Icesave málinu. Hann segir ljóst að allir fyrirvarar sem kunni að vera settir við afgreiðslu málsins kalli á viðræður stjórnvalda við Hollendinga og Breta.

„Frá mínum bæjardyrum séð er mikilvægt að það sé gert með þeim hætti að við séum ekki að hafna samningnum sem slíkum vegna þess að ég held að samningsstaða okkar yrði miklu mun lakari. Þar að auki tel ég að það myndi hafa verulega skaðleg áhrif á okkar efnhags- og atvinnulíf," segir Árni Þór.