Skuldabréf Nýja Landsbankans verður baggi á krónunni

Skuldabréf það sem Nýi Landsbankinn hefur gefið út til gamla Landsbankans mun verða töluverður baggi á krónunni á komandi árum þar sem það þarf að greiða í gjaldeyri. Upphæðin er 260 milljarðar kr. og þegar afborganir hefjast árið 2014 munu þær nema 60-70 milljörðum kr. á ári að mati greiningar Arion banka.

Greiningin fjallar um málið í Markaðspunktum sínum. Þar segir að umræðan um vanda krónunnar hefur oft á tíðum einskorðast við eignir erlendra aðila hér á landi í ríkisbréfum og innlánum. Lítið hefur hinsvegar farið fyrir umræðu um 260 milljarða kr. skuldabréf sem Nýi Landsbankinn hefur gefið út til gamla Landsbankans og mun fyrr eða síðar verða skipt yfir í gjaldeyri.

Fréttaflutningur af málinu var upphaflega á þá leið að greiðslur af láninu myndu strax hefjast og því yrði búið að eyrnamerkja í kringum 30 milljarða kr. af gjaldeyrissköpun þjóðarbúsins árlega næstu árin. Samkvæmt tilkynningu frá Fjármálaráðuneytinu verður hinsvegar ekki byrjað að greiða vexti og afborganir af láninu fyrr en árið 2014 og hefur þjóðarbúið því fengið ákveðinn gálgafrest í málinu. Hins vegar hefur fresturinn þau áhrif að áfallnir vextir og afborganir af höfuðstól lánsins dreifast yfir færri ár og því verða árlegar greiðslur hærri þegar byrjað verður að greiða af láninu árið 2014, eða í kringum 60-70 milljarðar kr.

Það er mat greiningarinnar að erlent greiðsluflæði nemi 150 milljörðum kr. á ári tímabilið 2014 til 2018. Í þessu mati er gert ráð fyrir að erlendum skuldum ríkisins (um 1,6 milljarði evra) sem voru til staðar fyrirhrun verði velt áfram - hinsvegar er alls óvíst að það takist, takist það ekki verða vaxtagreiðslur nokkru lægri en höfuðstólsgreiðslur miklu hærri .

Að sama skapi er gert ráð fyrir að ný lán, sem væntanlega verða tekin til styrkingar gjaldeyrisforða Seðlabankans, liggi að mestu óhreyfð og að þeim verði skilað á gjalddaga. Því koma einungis fram nettó vaxtagreiðslur af nýjum lánum hins opinbera. Verði gjaldeyrislánin hinsvegar notuð til að kaupa gjaldeyri veltur nettó kostnaðurinn á vaxtamuni við útlönd og gengi krónunnar.

Vaxtagreiðslur hins opinbera úr landi verða um 50 milljarðar kr. á ári næstu árin. Þegar endurgreiðsla á IceSave skuldbindingunni hefst árið 2016 munu vaxtagreiðslurnar hinsvegar ná um 100 milljörðum kr. á ári.

Inni í þessu mati er m.a. að vaxtagreiðslur vegna innlendra skuldabréfa í eigu útlendinga verða í kringum 30 milljarðar kr. næstu árin. Áætlaður vaxtakostnaður vegna gamalla lána ríkisins er í kringum 15 milljarðar kr. á ári. Árið 2012 falla til nettó vaxtagreiðslur vegna AGS lána. Árið 2015 bætast svo við nettó vaxtagreiðslur vegna annarra erlendra lántaka sem ríkið hyggur á að taka til styrkingar gjaldeyrisforða.

Endurgreiðsla á skuldabréfi Nýja Landsbankans til þess Gamla hefst árið 2014. Í upphafi verða vaxtagreiðslurnar um 20 milljarðar kr. en sú upphæð fer lækkandi eftir því sem greiðist inn á lánið. Greiddir vextir vegna IceSave verða um 40-60 milljarðar kr. á ári frá og með árinu 2016.

Hér er gert ráð fyrir að tekjur opinberra orkufyrirtækja dugi til að greiða vexti af þeirra lánum. Þó gæti sú staða komið upp að vaxtakostnaðurinn verði hærri verði háum lánum rúllað áfram í stórum stíl, þ.e. sjóðstreymi dugar ekki fyrir versnandi lánskjörum.

Afborganir hins opinbera af höfuðstól verða takmarkaðar næstu árin samkvæmt mati greiningarinnar sem ræðst m.a. af greiðslufresti sem fengist hefur á IceSave skuldbindingu og skuldabréfi Landsbankans.

Árið 2014 hefjast afborganir af höfuðstóli láns Nýja Landsbankans til Gamla Landsbankans. Upphaflega lánið nam 260 milljörðum kr. og verða árlegar greiðslur af höfuðstól því ríflega 50 ma.kr. á ári.

Endurgreiðsla vegna IceSave hefst árið 2016. Hér er gert ráð fyrir að höfuðstóll lánsins verði um 90 miljarðar kr. og verði greiddur með jöfnum afborgunum m.v. að 88% náist upp í forgangskröfur.

Til einföldunar er gert ráð fyrir að lánum orkufyrirtækja verði framlengt á gjalddögum, en þyngstu gjalddagarnir eru 2011 og 2012. Hið sama á við um erlend lán ríkisins sem voru til staðar fyrir hrun. Tækist ekki að velta lánunum áfram yrði útflæði gjaldeyris mun meira en hér er gert ráð fyrir. Í því samhengi er rökréttast að skoða endurgreiðsluferil erlendra lána hins opinbera að orkufyrirtækjum meðtöldum.