Alexander kominn af stað á ný

Alexander Petersson var á ný í leikmannahópi Flensburg í dag þegar liðið vann mjög öruggan 35-24 sigur á Magdeburg í þýsku úrvalsdeildinni í handbolta í dag.

Alexander þurfti ekki að hafa sig mikið í frammi í leiknum en gott er að sjá að hinn nýbakaði faðir skuli vera kominn á ról á ný eftir að hafa verið frá keppni síðan í nóvember eftir axlaruppskurð.

Það var Lars Christiansen sem var atkvæðamestur hjá Flensburg í leiknum, en hann skoraði tólf mörk, þar af sjö úr sjö tilraunum á vítalínunni. Oscar Carlén skoraði sjö mörk fyrir Flensburg í leiknum.

Hamburg sigraði Göppingen 30-28 á útivelli.