Misskilningur hjá forseta

Ólafur Ragnar Grímsson forseti Íslands komst í fréttirnar í Þýskalandi í morgun þegar hann sagði að Ísland ætti ekki greiða þeim sem töpuðu á innlánum Kaupþings í Þýskalandi. Þetta sagði hann við þýsku útgáfuna af Financial Times. Steinar Þór Guðgeirsson formaður skilanefndar Kaupþings segir þýska fréttamenn hafa sýnt málinu mikinn áhuga í morgun en einhver misskilningur sé í þessum orðum forsetans. Það hafi alltaf staðið til að greiða þessum innlánseigendum.

Kaupþing var með netreikninga sína, Edge, í Þýskalandi og voru um 30.000 þjóðverjar með innlán þar upp á um 330 milljónir evra eða um 50 milljarða króna.

„Þetta er einhver misskilningur enda hefur það alltaf legið fyrir að þessir reikningar munu ekki falla á íslenska ríkið eða almenning. Við erum að klára þetta með þýskum stjórnvöldum," segir Steinar.

Hann viðurkennir að ummæli forsetans komi á slæmum tíma. „Það liggur fyrir að við höfum alltaf ætlað að borga þessum innlánseigendum og það hefur ekkert breyst, menn eru hinsvegar að túlka að það sé eitthvað að breytast en svo er ekki."

Steinar býst við viðbrögðum frá embætti forsetans vegna málsins síðar í dag.