Forsetinn vill ekki að Ísland greiði fyrir Kaupþing í Þýskalandi

Ólafur Ragnar Grímsson forseti Íslands segir að Ísland eigi ekki að greiða þeim sem töpuðu á innlánum Kaupþings í Þýskalandi. Þetta kemur fram í þýsku útgáfunni af Financial Times í dag og hefur vakið töluverða athygli í Þýskalandi.

Kaupþing var með netreikninga sína, Edge, í Þýskalandi og voru um 30.000 Þjóðverjar með innlán þar upp á samtals 330 milljónir evra eða um 50 milljarða kr. þegar bankahrunið á Íslandi varð s.l. haust.

Ólafur Ragnar segir í samtali við FTD að Þjóðverjar verði að skilja það að Íslendingar hafi tapað öllu í bankahruninu. "Það er ósanngjarnt af erlendum fjárfestum að ætlast til að Ísland beri allar byrðarnar af fjármálakreppunni," segir Ólafur Ragnar.

FTD segir að ummæli forsetans séu í mótsögn við yfirlýsingar frá forráðamönnum Kaupþings. Í síðustu viku hafi Kaupþingsmenn fullvissað þýsku kröfuhafana að þeir myndu fá fé sitt endurgreitt.