Segir fjármálaráðherra hafa vitað af ráðningu Ásmundar

Haukur Halldórsson varaformaður bankaráðs Landsbankans segir að ráðning Ásmundar Stefánssonar í stól bankastjóra hafi verið gerð í samráði við fjármálaráðherra. Hann segir ákvörðunina hafa verið bankaráðs og Ásmundur hafi ekki sóst eftir embættinu. Ljóst sé að staða bankastjóra verði auglýst þegar efnahagsreikningur bankans liggi fyrir og vonast Haukur til að svo geti orðið seint í apríl. Hann segir bankaráð hafa talið meira gagnrýnisvert að ráða einn af framkvæmdarstjórum bankans frekar en formann bankaráðsins.

„Ásmundur hefur sinnt starfi formanns bankaráðs vel og hann er bankamaður þar sem hann var einn af framkvæmdarstjórum Íslandsbanka á sínum tíma, ég tel þetta því hafa verið besta kostinn í stöðunni. Það var ljóst að Elín vildi hætta og bankanum var enginn greiði gerður með því að hafa hana áfram. Við leggjum hinsvegar áherslu á að þetta er tímabundin ráðning," segir Haukur sem tekur við formennsku í bankaráði þegar Ásmundur verður bankastjóri.

Hann segir að bankaráð hafi viljað halda Elínu þar til efnahagsreikningurinn lægi fyrir en þar sem hún hafi viljað hætta nú um mánaðarmótin og ljóst að reikningurinn yrði ekki tilbúinn fyrir þann tíma hafi niðurstaðan verið sú að ráða Ásmund.

„Menn töldu það frekar gagnrýnisvert að ráða einhvern af núverandi framkvæmdarstjórum bankans," segir Haukur.

Aðspurður hvenær hann búist við að efnahagsreikningurinn liggi fyrir segir Haukur hugmyndir vera uppi um að það gæti orðið seint í apríl. „Ég get hinsvegar ekkert fullyrt um það en vonandi verður það fyrr. Það eru mörg mál sem þarf að útkljá."

Haukur segir engan óróleika vera vegna þessa hjá bankaráði né fjármálaráðherra sem var kynnt ákvörðunin. „Það var búið að ræða þetta við fjármálaráðherra áður en það var ekki búið að ræða neinar dagsetningar."

Upplýsingafulltrúi viðskiptaráðuneytisins sagði í samtali við Vísi að Gylfi Magnússon viðskiptaráðherra áréttaði fyrri skoðun sína um að auglýsa ætti allar þrjár stöður bankastjóra sem fyrst. Að öðru leyti sé þetta ekki á könnu Gylfa þar sem það sé fjármálaráðherra sem fari með eignarhlut ríkisins í bönkunum.

Ekki náðist í Steingrím J. Sigfússon fjármálaráðherra.