Tímabilið búið hjá Loga

Logi Geirsson leikur ekki meiri handbolta á þessu tímabili. Það fékk hann staðfest fyrir um klukkutíma síðan. Öxlin á Loga er verr farinn en talið var í fyrstu og hann mun þurfa að gangast undir aðgerð vegna meiðslanna.

Það tekur frá þremur upp í fimm mánuði að jafna sig af slíkum meiðslum og Logi verður því ekki kominn aftur á ferðina fyrr en í sumar.

„Ég var bara að fá þessi tíðindi og er í nettu sjokki. Ég átti alls ekki von á þessu. Er eiginlega enn að melta þetta bara," sagði Logi í samtali við Vísi áðan.

„Tímabilið er bara búið hjá mér. Ég fór fyrst í myndatöku fyrir þremur vikum síðan og þá sáu þeir ekki neitt. Héldu bara að þetta væri tognun eða eitthvað og hafa því verið að sprauta mig á fullu. Þvílíkt klúður og læknavesen. Þeir sáu ekki að það var komin sprunga í axlarliðinn," sagði Logi hundsvekktur.

Logi kemur líklega heim á morgun og mun hitta lækna landsliðsins hér á landi. Hann mun líklega leggjast undir hnífinn hér heima enda hefur reynslan sýnt að það gefur betri raun en að fara í aðgerð erlendis.

„Það er smá séns að ég nái landsleikjunum í júní. Ég vonast til þess," sagði Logi sem hefur leikið vel með landsliðinu og fjarvera hans er enn eitt áfallið fyrir íslenska landsliðið sem þegar er án fjölda lykilmanna.

Logi er eðlilega svekktur að missa af lokum tímabilsins enda enn markahæsti leikmaður Lemgo þó svo hann hafi ekki alltaf fengið að spila eins mikið og hann vildi.

Stórskyttan úr Hafnarfirðinum ætlar þrátt fyrir áfallið ekki að sökkva sér í þunglyndi enda jákvæður maður með eindæmum.