FME beitir Nýsi stjórnvaldssekt upp á 10 milljónir

Fjármálaeftirlitið (FME) hefur tilkynnt Nýsi hf. að stjórn FME hafi tekið ákvörðun um að beita félaginu stjórnavaldssekt, að upphæð 10 milljónir kr, þar sem háttsemi Nýsis hafi farið í bága við lög um verðbréfaviðskipti á sex mánaða tímabili frá byrjun árs 2008.

Þetta kemur fram í tilkynningu frá Nýsi hf. Jafnframt segir að rétt er að fram komi að stjórnendur félagsins á framangreindum tíma haf látið af störfum. Ný stjórn var skipuð hjá félaginu þann 14. apríl s.l. og núverandi framkvæmdastjóri þess tók til starfa 16. febrúar 2009.

Nú stendur yfir þrep tvö í endurskipulagningu hjá Nýsi hf. sem er að straumlínulaga reksturinn og eignir félagsins. Þetta getur þýtt að eitthvað af félögum verði sett í þrot og/eða félög leyst upp. Nú þegar hafa Nýsir fasteignir ehf., sem nokkur dótturfélög sem eiga fasteignir, og Engidalur, sem á húsnæðið að Reykjavíkurvegi 74, verði tekin til gjaldþrotaskipta. Einnig hafa dótturfélög Nýsis fasteigna, Borgarhöllin ehf. og Rekstrarfélag Egilshallarinnar ehf., verið tekin til gjaldþrotaskipta.

Að lokinni vinnu við þetta mun taka við framtíðarrekstur félagsins eða nýs félags sem mun taka yfir hluta af eignum þess. Allt er þetta háð samþykki kröfuhafa Nýsis og þeirra aðila sem Nýsir er með samninga við. Við þessa vinnu eru margir óvissuþættir þannig að ekki hefur verið ljóst hvor framangreind áform gangi eftir. Eins og staðan er nú eru taldar meiri líkur en ekki á því að það takist að verja einhver verðmæti upp í þær kröfur sem hvíla á félaginu.

Með vísan til framanritaðs og til þess hversu mikið hefur dregið úr starfsemi félagins hafa stjórnendur þess ekki talið fært að ráðast í endurskoðun á reikningum félagsins og dótturfélaga. Þegar fyrir liggur hvort takast muni að bjarga félaginu verður tekin ákvörðun um ársuppgjör vegna ársins 2008. Gert er ráð fyrir að þetta muni liggja fyrir á næstu vikum.

Með vísan til framanritaðs hefur beiðni verið lögð fyrir kröfuhafa sem eiga skuldabréf á hendur Nýsi og skráð eru hjá Kauphöll Íslands um að skuldabréfin verði tekin úr viðskiptum í kauphöllinni.