Toyota að skoða framhaldið í Formúlu 1

Svo virðist sem Toyota sé að skoða gaumgæfilega hvort liðið verður í Formúlu 1 til frambúðar eður ei. Toyota vill ekki staðfesta þátttöku í mótaröðinni á næsta ári fyrr en eftir stjórnarfund þann 15. nóvember.

John Howett yfirmaður Formúlu 1 liðs Toyota segir að liðið verði á ráslínunni á næsta ári, en vill samt ekki staðfesta það formlega fyrr en eftir fundinn í Japan.

"Ég er viss um að við verðum á ráslínunni á næsta ári, en maður veit samt aldrei um neitt í lífinu upp á tíu fingur", sagði Howett.

Toyota hefur verið sjö ár í Formúlu 1 og Jarno Trulli náði öðru sæti á heimavelli liðsins í Japan um síðustu helgi. Liðið hefur samt aldrei landað sigri, sem fer fyrir brjóstið á eigendum liðsins í Japan. Þá hefur liðið ekki staðfest samning við ökumenn sína.

"Trulli er búinn að vera með okkur í fimm ár og án þess að vera harður í horn að taka, þá hefur hann ekki skilað tilætluðum árangri. Við vorum fremstir í Spa, en náðum ekki að vinna. Við verðum að finna leið til að sigra", sagði Howett.

Talið er að liðið sé að vinna í því að fá Kimi Raikkönen til liðsins, en Toyota missti af Robert Kubica sem ákvað að semja við Renault.