Útiloka ekki að dagblaðið 24 stundir verði endurvakið

Nýir fjárfestar í Árvakri, útgáfufélagi Morgunblaðsins, þurfa að leggja fram rúman hálfan milljarð króna, til viðbótar yfirtöku skulda, vilji þeir eignast félagið. Í tilboðsgögnum er ekki útilokað að dagblaðið 24 stundir verði endurvakið.

Fyrirtækjaráðgjöf Nýja Glitnis, sem sér um söluna á Árvakri, hefur boðið fjórum hópum fjárfesta að leggja fram skuldbindandi tilboð í félagið. Í tilboðsgögnunum kemur fram upphæð þeirra skulda sem hvíla á Árvakri, alls um 4,6 milljarðar króna - sem eru bæði skammtíma- og langtímalán og munu væntanleg tilboð einkum ganga út á hve mikið nýr hluthafahópur er tilbúinn til að taka yfir af skuldum félagins.

En það er ekki nóg því auk yfirtöku milljarðaskulda þurfa nýir hluthafar að reiða fram rúmlega fimm hundruð milljónir króna - annars vegar 300 milljónir í eigið fé og hins vegar tæpar 230 milljónir sem eru kröfur komnar á gjalddaga. Ýmislegt forvitnilegt er að finna í tilboðsgögnunum, sem fréttstofan hefur undir höndum. Þar segir til að mynda að fjölmiðlar á Íslandi - Ríkisútvarpið þar með talið - eigi í verulegum rekstrarerfiðleikum.

Árvakur hafi hins vegar mikla möguleika. Fullyrt er að unnt sé að auka sjónvarpsútsendingar á netinu á hagkvæman hátt og að dagblaðið 24 stundir megi endurvekja með skömmum fyrirvara - fýsilegur kostur sé að gefa það út í takmörkuðu upplagi ef útgáfu Fréttablaðsins verði hætt.

Að auki geti félagið gefið út sérblöð um leið og efnahagsástandið batnar, sem geti gefið góðan hagnað. Þrír innlendir fjárfestahópar hafa sýnt Árvakri áhuga og það hafa tveir erlendir auðmenn einnig gert.

Bindandi tilboð fjárfesta skulu berast eigi síðar en klukkan fjögur næstkomandi fimmtudag.