Kortavelta sýnir hríðversnandi stöðu íslenskra heimila

Ört minnkandi kortavelta að raunvirði er til marks um hríðversnandi stöðu íslenskra heimila. Erlend velta hefur skroppið mun meira saman en innlend, enda leggjast veik króna og erfiðari fjárhagur margra heimila á eitt um að draga úr ferðagleði landans.

Greining Glitnis fjallar um málið í Morgunkorni sínu. Þar segir að samkvæmt nýbirtum tölum Seðlabanka nam heildarvelta innlendra kreditkorta í janúarmánuði 24,5 milljörðum kr., en þar sem velta kreditkorta er miðuð við kortatímabil en ekki almanaksmánuði í tölum bankans er hér um stóran hluta jólaverslunar landsmanna að ræða.

Að krónutölu var veltan 15% minni í síðasta mánuði en á sama tíma í fyrra. Það segir hins vegar ekki alla sögu vegna þess hversu verðlag hefur hækkað mikið og krónan fallið á tímabilinu.

Sé veltan staðvirt með vísitölu neysluverðs og gengisvísitölu krónu kemur upp úr dúrnum að innlend kreditkortavelta dróst saman um tæp 28% á þessu tímabili og erlend velta um nærri 54% á sama tíma.

Erlendu veltutölurnar ríma raunar ágætlega við aðrar vísbendingar um ferðagleði Íslendinga á borð við brottfarir um Leifsstöð. Mikið dró þannig úr jólainnkaupaferðum til útlanda á milli ára, og eins virðist landinn frekar stunda skíðamennsku innan lands en utan eftir bankahrunið, miðað við síðustu misseri.