Vilja setja upp eldfjallafræðagarð við Gjástykki

SUNN, samtök um náttúruvernd á Norðurlandi, vilja að Gjástykki í Þingeyjarsýslu verði verndað fyrir hvers konar raski. Þetta kemur fram í ályktun samtakanna frá því í gær.

Gjástykki, sem er rétt norðan við Kröflu, er það svæði í heiminum á þurru landi sem best sýnir hvernig landreksflekarnir færast í sundur, að mati Ingólfs Ásgeirs Jóhannessonar, formanns SUNN. Vilja samtökin því að stjórnvöld berjist fyrir uppbyggingu eldfjallafræðagarðs í Gjástykki og við Leirhnjúk, sem er vestan Kröflu.

Þegar hafa rannsóknarboranir hafist við Gjástykki í hrauninu norðanverðu en iðnaðarráðherra setti það skilyrði á síðasta ári að frekari boranir þyrftu að fara í umhverfismat. SUNN lýsir yfir andstöðu við þessar rannsóknarboranir. Segja samtökin að boranir sem þessar kosti sitt og það sé alltaf ljóst að þegar þær fari fram hyggist framkvæmdaraðili virkja.

„Við sem viljum vernda Gjástykki viljum ekkert rask þar og teljum að kostnaður við rannsóknarboranir sé óásættanlegur ef þar verður svo aldrei virkjað," segir í ályktuninni. Skora þau jafnframt á umhverfisráðherra að hefjast handa við undirbúning friðlýsingar svæðisins svo tryggja megi eftir föngum að svæðið verði lyftistöng fyrir Íslands.- vsp