Stakk 5 ára gamla stelpu með eggvopni

Tuttugu og tveggja ára gömul kona var handtekin í Keflavík í dag grunuð um að hafa veitt 5 ára gamalli stelpu áverka með eggvopni.

Mikil lögregluaðgerð stóð yfir í Keflavík í morgun vegna málsins. Ekki er vitað hvort konan hafi þekkt eitthvað til stelpunnar eða hvað vakti fyrir henni.

Litla stelpan var flutt með sjúkrabíl á slysadeild í Fossvogi. Hún mun hafa verið með stungusár á brjósti. Þaðan var hún flutt á gjörgæsludeild á Hringbraut. Stúlkan er í stöðugu ástandi og verður undir eftirliti á gjörgæslunni fram til morguns, samkvæmt upplýsingum frá vakthafandi lækni þar.