Bílarnir voru ekki boðnir út

„Við sáum enga ástæðu til að efast um að verið væri að gera eins góða sölu og mögulegt væri," segir Finnur Sveinbjörnsson, bankastjóri Kaupþings, um sölu bankans á bifreiðum sem fyrrum stjórnendur bankans höfðu til umráða. Greint var frá því í kvöldfréttum Stöðvar 2 að bílarnir hefðu verið 50 talsins en Finnur segir að þeir hafi verið 27.

Að sögn Finns voru kaupendur fundnir eftir þremur leiðum. „Í einhverjum tilvikum höfðu þeir starfsmenn sem höfðu haft viðkomandi bíla til umráða áhuga á að kaupa bílana, segir Finnur. Hann bendir á að tveir bílasalar hafi þá verið látnir verðmeta bílana áður en þeir voru seldir. „Í einhverjum tilfellum fór salan fram í gegnum bílasölu og síðan eins og hefur komið fram að þá seldum við þá í pakka," segir Finnur. Hann segir að Kaupþing hafi haft samband við helstu bílasölur og landsins og tekið hagstæðasta boðinu. „Það var eitt boð sem skar sig klárlega úr. Þá var boðið upp á staðgreiðslu sem okkur hugnaðist vel," segir Finnur. „En það var ekki farið í formlegt útboðsferli," segir Finnur.

Hann segir að bankanum beri skylda til þess að gæta hagsmuna bankans og eigandans sem er fjármálaráðherra og almenningur í landinu. Finnur telur að það hafi tekist í þessu tilfelli og bendir á að bílasalar hafi sagt í fjölmiðlum að lúxusbílar væru seldir með 30-40% afslætti þessa dagana. „Og við vorum að selja með 30% afslætti þannig að ég get ekki sé betur en að við höfum verið að fá eins gott verð og við mögulega gátum," segir Finnur.