Laursen frá í tvo mánuði eftir uppskurð

Danski varnarjaxlinn Martin Laursen hjá Aston Villa verður ekki með liði sínu næstu tvo mánuðina eða svo eftir að hafa gengist undir hnéuppskurð.

Danski landsliðsmaðurinn hefur verið lykilmaður í vörn Villa í vetur og er þetta því nokkuð áfall fyrir spútnikliðið frá Birmingham sem virðist ætla að blanda sér af alvöru í baráttuna um sæti í Meistaradeildinni í vetur.

Meiðsli Laursen þýða að þeir Zat Knight og Carlos Cuellar munu líklega berjast um að vinna sér sæti í miðvarðarstöðunni við hlið Curtis Davies.