Kauphöllin afgreiddi 93 eftirlitsmál á síðasta ári

Í yfirliti kauphallarinnar um eftirlitsmál kemur fram að kauphöllin hefur afgreitt 93 mál á síðasta ári. Þar af var 26 málum vísað til Fjármálaeftirlitsins (FME) til frekari skoðunar. Til viðbótar voru 11 mál enn í vinnslu í árslok.

Af málunum 93 afgreiddi kauphöllin 56 mál vegna gruns um brot á reglum um upplýsingagjöf. Málin voru afgreidd með mismunandi hætti; með athugasemdum (39), óopinberri áminningu (8), opinberri áminningu (3) og févíti (3). Þá voru 3 mál áframsend til FME.

26 mál sem lúta að viðskiptum með verðbréf voru afgreidd. Af þeim voru 3 mál afgreidd með athugasemdum og 23 mál áframsend til FME til frekari skoðunar. Um var að ræða mál vegna gruns um markaðsmisnotkun (11), gruns um ólögleg innherjaviðskipti eða brot á reglum um birtingu innherjaupplýsinga (8), gruns um brot á reglum um hagsmunaárekstur kauphallaraðila og viðskiptavinar (2), og mál er varða bestu framkvæmd viðskipta (2).

Ellefu mál voru afgreidd án athugasemda.